lunedì 19 settembre 2011

السياسه بين مهزلة الرياضه و الاحزاب و البلاد في دوامة التهميش و الشعب محكوم عليه بالعذاب

من مهازل السياسه في تونسي





البارح تفرجت في شكري الواعر يحكي على برنامج الحزب اللي يمثلو، الإتحاد الوطني الحر، و بدا يعطي في درس للدكتور منصف المرزوقي و زيد ما يعرفش حتى اسمو، بقيت نضحك مالغلب و الدنيا المعكوسة، حاصيلو نلقى برشة باجات ردوه تكركيرة و كتبوا: الدكتور شكري الواعر يستهزئ بحارس المرمى منصف المرزوقي، ملا رقعة ما عندنا ما نقولو، شكري الواعر يغير موقعه في اللعب ٠٠ حتى هذا ولى يفهم في السياسة؟؟ بعد أن كان حارس مرمى أصبح مهاجم سياسة ٠٠٠ هههه الوقت 
المعكوس سكت الكنالو و تكلم الخنفوس عندو حق حمة الهمامي كيف قال فصل الرياضة عن السياسة.....
من باب الديمقراطية من حقّو يترشح و يحكي، هو صحيح ما تهجّمش على المرزوقي أما تمقعر عليه زعمة زعمة ما يعرفش اسمو... مستوى كوارجي و قهواجي الله غالب آش تحب تعمل؟؟؟
ڨــــــول ولى يفقه في العمل السياسي ، الإحتراف السياسي صعيب عليك يا شكري الكوارجي !!!! و إلا يحب يقيد إسمو في الثورة و يشارك في الحياة السياسية للتصدي لأهداف الثورة توة!! هههه
زيد على ذلك ما نجمش يقول الحاجة إلي قالها الشعب بصوت عالي " خبز وماء وبن علي لا"، بدل فيها قال " خبز وماء و الظلم لا"، بالله يا توانسة إنتوما قلتو خبز و ما و الظلم لا ؟؟؟؟ نا نتفكّر شعار : خبز و ما و بن علي لا . يا شكري الواعر ماكش حافظ شعارات الثورة؟؟؟ أين كنت أيام الثورة؟؟؟؟ ياخي مصدق روحو شكري الواعر!! تقريب حتى هو غلطوه
اللي نعرفو على شكري الواعر عن قرب أيام ما كنت طالب في تونس و نقعد في المقهى متاعو "شعاع الشمس" اللي في الباساج، إنو رجولي و يحب الزوالي و يعاون القليل، و محبوب مالشعب، و يتبرع و ما يحبش الفخرة و التباهي، أما راهو حكم على روحو بالموت في قلوب الناس اللي حباتو و احترماتو، يا شكري هذي مش تكويرة مع المتخب باش تكسب تشجيع التوانسة الكل، هذي معركة سياسية؛ يعني اللي باش تعانيه مشاكل أكثر ماللي باش تربحو، و اللي باش يكرهوك أكثر برشة ماللي باش يحبوك، شكري الوعر راك باش توفى و تدمر حياتك وحدك بدخول السياسة، سامحك الله إنت و الرياضين الآخرين لا تكونوا لعبة في أيادي السياسيين، يا شكري أخرج من السقف الي حطوك تحتو راهو خايخ و راهم استعملوك باش ينظفو تصويرتهم قدام الناس٠٠٠٠ 
لاحظت برشة عباد زادة تتهجم عليه و تقلو يا غبار المرزوقي سيدك، و بدوا مناصرو المرزوقي في حملة الدفاع الشرس و إستعراض السيرة الذاتية لمرشح حزبهم و المقارنة في المستويين العلمي و الأخلاقي عيب و الله عيب؛ صحيح المقارنة لا تجوز أبدا أبدا بين الواعر و المرزوقي، أما زادة ماكمش تشوفو في تقديس و تأليه للدكتور المرزوقي؟ شنية سيدك هذي؟؟؟ سيدنا ربي و نحنا عبادو، كيما قلنا المقارنة لا تجـــــــوز، و شتان بين الثرى و الثريا.... لكن المرزوقي زادا عندو عيوبو و تهجم على حزب الواعر، فـــ سي شكري جاوبو....
نا ضدّ ترشّح شكري الواعر للمجلس التّأسيسي لكن في نفس الوقت نقول إنّو كلّ تونسي عندو حقّ باش ينتقد أيّ سياسي، دون التجريح، تقديس العباد و تأليهم و النّفخان في صورتهم ما عادش يصلح بينا في تونس ما بعد الثورة٠٠٠ المرزوقي هو مجرّد سياسي قابل للنقد كيف غيرو و كيف أي سياسي عندو غلطات و لازم أنصارو يحملوا النّقد و الّا يفكّ عليهم من السياسة....لا لسياسة التأليه و هزّان القفة، 
انا نحترم المرزوقي برشة برشة خاطرو على ڨـد ما هو مليـــان بقى مثال للتواضع، و إنشاء يبقى ديما كيما هكـــا


السلام عليكم و رحمة الله و بركاته انتهى عصر العبوديه كل شعوب الأرض من حقها أن تنعم بالحريه امرنا الله بالعلم و التعلم و نشر العلم
لذا انا أسعى للعلم و المعلومه حتى أضعها في خدمة الإنسان أينما كان المهم أن تكون ذات نفع و إيفاده SALVE IO SONO UN SEMPLICE CITTADINO CHE APPARTIENE A QUESTO MONDO AMO LA LIBERTA E LOTTO PER LA LIBERTA DEI POPOLI QUA POTETE TROVARE UN PONTE CULTURALE CHE UNISCE IL MONDO NON RAZIALE.